jueves, 28 de marzo de 2013

un darrèr viatge

non se pòden gobernar
es sònnis en dromir

dilhèu per desirar
dilhèu per insistir

poder veder-te e parlar
veder-te arrir

un darrèr viatge

bona net pare

lunes, 12 de marzo de 2012

è vist a arrir eth lunfèrn

è vist eth lunfèrn
m'a volut guardar d'apròp

è volut cridar
mès auie es sues mans en còth

è volut hugir
mès non m'a deishat era pòur

è vist arrir eth lunfèrn
e se m'a gelat eth còr

sábado, 11 de febrero de 2012

a on ès pàir

a on ès pair
que te cerqui
e non i ès
a on ès pair
que te parli
e non dides arren
a on ès pair
que me pèrdi
e non te veigui
a on ès pair
que t'estimi
e è heired
a on ès pair
que plori
e non venes

domingo, 18 de diciembre de 2011

eth mèn pàir ei eth mar

eth mèn pàir ei gaudir
ei anar tà pescar
bèth tòn e navegar
ei méter eth Madrid Barça
e veir eth gòl e cridar
cullunut, cullunut, cullunut

eth mèn pàir ei arribar tard
ei alongar er esdejoar
enquiara ora de dinar
dinar enquiara ora de brespalhar
e hèr " un shinhau" de dormida
enquiara ora de sopar

eth mèn pàir ei eth dimenge
ei liéger es diaris
damb ua biera e un mòs
e dempús anar a crompar
just ena ora de barrar
es doci tà dinar

mès sustot
eth mèn pàir ei eth sable
eth mèn pàir ei era plaja
eth mèn pàir ei eth mar
ès et sable, era plaja, eth mar
ès trapar-te a mancar

miércoles, 7 de diciembre de 2011

eth dia qu'eth mèn pair partec
eth cèu volec plorar
sustot pera tarde
coma se non podesse parar

eth dia qu'eth mèn pair partec
eth mar se volec trincar
plan ben tota era tarde
qu'es aigües se van boledar

eth dia qu'eth mèn pair partec
eth vent se volec enforiscar
coma un audèth pera tarde
que non sap cap a on parar

mès eth dia qu'eth mèn pair
podec reposar
eth cèu dauric un hurat
lo volie illuminar
eth mar se mostrèc aplanat
lo volie acomodar
eth vent quedèc parat
lo volie contemplar

eth dia qu'eth mèn pair partec
plorè desconsolada

mès eth dia qu'eth mèn pair
podec reposar
me perdí ena milhor abraçada

domingo, 16 de octubre de 2011

encara non

non per mès anonciada
ei mens trista ua despedida

non per mès anonciada
ei mens sobtada

non per mès anonciada
ei mens temuda

maudita sigue
era sua arribada

miércoles, 28 de septiembre de 2011

tastar er azard

eth guardar instantanèu
un relampit de sensacions
eth punt just de lutz
era acertada manca de color

gaudir d'un tròç de sòrt
en aguesta punida vida
ei coma picar damb ua hièstra
damb era melhor orientacion

viernes, 10 de junio de 2011

tempèstes visceraus

non ei hújer
poder escapar

non ei témer
voler-se amagar

non ei indigne
deishar-se portar

non ei fàcil
mès ei volar

jueves, 2 de junio de 2011

m'ac a dit eth men gat


era vida cor e cor
e cor tant
que cor mès que jo
e cor tant
que se m'escape

mès no me i esfòrci
entà perseguir-la
era mia vida
non servirie d'arren
ja ac è sajat

ja sabi coma ei
era mia vida
ja hè fòrça ans
que mos coneishem

per açò quan la veigui córrer
la dèishi passar
era mia vida
e de net quan era vida se pare
jo hèsqui coma es gats

me i apròpi pòga pòc
e l'atrapi
atau hesqui qu'era vida
sigue era mia

viernes, 1 de abril de 2011

ja non sò qui ère
ja non sauti e corri
se non pogui veir eth tèrra

ja non sò qui ère
ja non considèri amics
es que non son enemics

ja non sò qui ère
ja non vau tà dormir tard
se me cau lheuar d’ora

ja non sò qui ère
ja non cerqui aventuraires
entà planificar aventures

ara sò qui sò
non pas qui ère

ara sò qui sò
e sauti e corri mès
damb eth mapa deth tèrra

ara sò qui sò
e è pòqui amics
dignes de plorar per eri

ara sò qui sò
e non vau tà dormir lèu
se me pogui lheuar tard

ara sò qui sò
e viui aventures
sense soniar damb aventuraires
ara sò qui sò
e sò erosa
pr'amor qu'era vida me viu

miércoles, 23 de marzo de 2011

quinsevolh dia se pòt brindar


compdar es dies
e veir-les passar

compdar güaires ne portes
compdar güaire te manquen
entà començar a acabar

sonque nosati compdam
çò que non se pòt pas cambiar
quines peguejades!

viernes, 18 de marzo de 2011

enquia lèu David

aué mè dat compde
que sò amiga de tà pair
pr'amor qu'eth ma dat amor
dilhèu pr'amor que tu
tanben mos en daues
aué m'e dat compde
que sò en casa

lunes, 7 de marzo de 2011

ouitia

damb era sòrt des amigues
è anat tà cercar
quauqui troci d'alegror
e en tot tornar m'è encuedat
qu'è perdut es tristors
non sabi a on les deishè
non les trapi en cap cornè

viernes, 18 de febrero de 2011

herida

maudita era vida
tant cuerta
maudites es nets
tant longues

lunes, 14 de febrero de 2011

sonque demorar

volerie dromir entà poder partir
deth moment que m'a tocat demorar
mès è pòur de non poder escapar
des mèns pròpris malsòns

volerie plorar entà poder esborrar
es maus arrebrembes restancats enes uelhs
mès è pòur de diboishar
es ombres des mies angoishes

volerie distrèr-me
solament demorar,
credetz qu'ei possible
deishar de pensar?

martes, 8 de febrero de 2011

desestacar-se

gaudir d'un cornèr
o patir ua possession
nadar en veires de vin
o avergonhir-se de cedir
crear es pròpries condicions
o encastrar-se enes religions

lançar-se a víuer e patir
o guardar, envejar e sofrir

lunes, 31 de enero de 2011

nauta fidelitat

non é
non sai cap se poderè
volerie non voler

ei parièr
es mens gats m'aimen

sábado, 22 de enero de 2011

arramat de moments

ai de nosati
se non profitam pas
es cornèrs, eth vin, eth repaus
era companhia o era solitud

per qué era felicitat solament ei
arreconéisher es boni moments
non auer de plorar-les
saber-les rebrembar

viernes, 31 de diciembre de 2010

trigar patir

darrèr dera hièstra
guardar passar
amagar-se de patir
poder contemplar
sense participar
mès veir a gaudir
córrer, parar, caminar e jogar
mos harà desirar
tocar, sénter, olorar e tastar
riscar-se a gésser
deuant dera hièstra
er embolh exterior
lutz, aulors, formes e colors
heireds e calors
e totes es pòurs
pr'amor qu'era pòur de patir
mos harà a hugir
desirar era cauma
eth silenci, era escuror
d'entrar e dromir
atau víuer
ei er art d'escuélher
se volem entrar o gésser
e de quina manèra
auram de patir
era tragèdia de trigar
ei non poder pas cambiar
çò que ja ei decidit
e non saber pas acceptar
que non ne depen pas eth deman
pr'amor que víuer ei escuélher
en quin costat demorar
e escuélher ei patir
pr'amor que deth destin
non se'n pòt pas hugir
pr'amor que ua hièstra
pòt trincar era lutz
pòt amagar eth brunit
pòt cambiar es formes
e pòt amortar es aulors
mès ua hièstra
non pòt pas esborrar
ne dobtes ne errors
ne dolorosi rebrembes
ne trèir es pòurs

lunes, 27 de diciembre de 2010

caminar entà deuant

víuer ei caminar
caminar entà decidir
escuélher que perseguir
escuélher que deishar tà darrèr
per açò víuer
ei artenher alegror
ei patir doloroses pèrtes
pr'amor que non se pòt pas caminar
sense anar tà deuant
atau donques
Bon Nadau entà tostemp
pr'amor que sobervíuer un Nadau
ei un pas tà deuant

sábado, 13 de noviembre de 2010

tot s'acabe

quan ei prèst a partir
prèst a perder-se
alavetz t'encuedes
de quan ac traparàs a mancar
mès tot s'acabe
era vida ei morir e renèisher

viernes, 24 de septiembre de 2010

eth privilègi de patir

plorar era manca de quauquarrés
desirar païasatges perdudi
soniar damb moments ja vençudi
solament un ésser afortunat
pòt plorar tormentat
entà auer coneishut era felicitat

lunes, 23 de agosto de 2010

maitins d'ostiu

era desendreçada abraçada
des linçòs endromits
era hujuda dispersada
des sòns maitièrs
era doça telaranha
que restanque es pensaments

eth diboish d'ua hièstra fresca
pintat peth cant des audèths

ei eth reclam presumit
d'un bèth maitin d'ostiu

jueves, 22 de julio de 2010

net d'ostiu

arribarè en casa amorassada pera fresca
abraçada pes sons dera net
m’acompanharàn ath lhet
intimaments
coma eth mès secret des amants

demorarè entre sòns e relampits
e es aulors der ostiu
entraràn pera hièstra
furtivaments
coma eth mès descarat des pretendents

domingo, 6 de junio de 2010

mirar passar

aué e vist coma eth temps
hège eth sòn camin
coma tostemp
ac e vist
en tot passar-me peth deuant
ath temps
sonque lo podem mirar passar
jamès lo poiram governar
ne hèr-lo córrer, ne hèr-lo arturar
pr'amor que ja i ere eth temps
abantes que comencèssem a condar

miércoles, 5 de mayo de 2010

passar eth temps sense pensar

jo volerie èster
coma eth mèn gat
que se sè e demore
deuant dera hièstra
e guarde eth temps
e lo ve a passar
e dilhèu pense çò que harà
mès se’n sap desbrembar
quan torne a veir virar
es huelhes, e eth temps, e eth deman
jo volerie èster
coma eth mèn gat
que cada maitin
quan se lhèue
daurís es uelhs
entà tornar a començar
e non decidís que passèc
ne se agèr l'acertèc
ne se aué saberà endonviar
era hièstra per a on guardar

viernes, 30 de abril de 2010

era vida laguens d’ua man

a viatges me guardi
es mans an tanta vida
se me i fixi plan
i veigui un mapa
eth dera mia vida
tanta fòrça, patiment, amor
tantes causes escrites
a viatges me guardi es mans
e en eres te cerqui
enes sòns diboishi
son es mèns moments
es que m’as dat
e era distància me shòrde
e non me dèishe veir clar
a viatges me guardi es mans
e les pregunti per a on as partit
jo que me pensaue
que t’auie agarrat
mès non se pòt acaçar
era vida laguens d’ua man
a viatges me guardi es mans
pr'amor qu'è pòur
de trapar-te a mancar

viernes, 2 de abril de 2010

retrobar amics perdudi

era gent grana non tem pas ara mòrt
diderie qu'autaplan
la vòlen arrecéber de cara
serà per que darrèr d'era
i demoren toti es sòns

domingo, 21 de marzo de 2010

banh de lutz

sonque de net
quan non i a lutz
se me pèrd era vida
laguens es ombres
demorarè pacienta que siguen es clarors deth dia
es que me tròben a jo e me banhen de vida

jueves, 18 de marzo de 2010

amagader secret

volerie amagar-me en lhet
jos eth coishin
barrar es uelhs
diboishar eth mèn desir
e trobar-te-i en miei

lunes, 1 de marzo de 2010

caminar entre eth hilat

a viatges se me presente era vida
coma un gran rambolh
coma un mar de nuds
terriblements complicada
mès fòrça doça e trenda

domingo, 21 de febrero de 2010

caminam entara pròpria sòrt

credem ena sòrt quan mos manque era confidança
negam que l'auem de besonh quan patim arrogància
en toti es camins n'i a de sòrt
dera bona e dera dolenta
e víuer ei caminar tà deuant
e auer d'acceptar-la

domingo, 14 de febrero de 2010

cercar era lutz

aué è decidit gésser
entà cambiar era mia sòrt
m'animè anet
mentre imaginaue damb illusion
çò que voi que passe deman

domingo, 7 de febrero de 2010

tempèstes passatgères

senti er esperit apagat
cansat, hèt un nud
senti pòca esperança
ja ac sabi, ja ac sabi
tot passe e mos arribe a toti
maudit sigue eth cervèth
e era sua aficion as escacs

sábado, 30 de enero de 2010

ei quan non i ès pas que veigui er uet

pensaue que serie era mia sòrt
era que me harie a patir
pensaue que serien es mies pòurs
es que me harien a hugir
sabi que non serà pas atau
ara qu'as partit

domingo, 24 de enero de 2010

arren non pese mès qu'era pròpria colpa

quan béuer non ei pas medecina
entà desbrembar es pròpries penes
mès òc un podom potent
entà lheuar-se avergonhit
ne era confession a un amic serà perdon sufisent

domingo, 17 de enero de 2010

ahèrs d'Aran

ei eth païsatge d'un país
eth que diboishe es sues cases
ei eth trabalh que i pòt hèr er òme
eth que lo vestís de tradicions
mès ei era sua gent e era lengua que parle
la que da ath país eth sòn nòm

sábado, 9 de enero de 2010

intolerància

en aguest mon a on veneram era perfeccion
despreciam tot vici o irreveréncia
quèm ena trapadera dera rutinària disciplina
mos aluenham estupidament d'arténher era libertat
voi èster un hòl, voi èster un maintge
voi víuer damb plenitud

viernes, 1 de enero de 2010

refortilhar paraules

ei era tradicion millenària
de costums ancestraus e arraïtzadi rituaus
era que da sens ara paraula identitat
la traparàs per tot eth mon
e en cada cornèr ua particulara varietat

domingo, 27 de diciembre de 2009

hèstes de nadau

moments dificils, de reflexion
d'imposada alegror, de manifèsta solitud
demoram qu'escampen es colpes
que les atire eth nau dia
que clareje eth nau an

jueves, 24 de diciembre de 2009

domingo, 13 de diciembre de 2009

cornèr de mònt

entà amiar a tèrme es illusions
sonque se necessite era confidança des amics
gràcies a toti vosati pera vòsta

martes, 1 de diciembre de 2009

hèsta major

es maitins se desvelhen damb eth cant des campanes
es vesins plan elegants charren ena plaça
e damb ua gorjada de vin doç alègren era hame
aué ei dia de hèsta

lunes, 16 de noviembre de 2009

bastir amistats

mantier es amistats
demane fòrça energia
vau era pena?
ei clar que òc
mès a viatges se me presente eth dobte
no vos passe çò de madeish?

lunes, 9 de noviembre de 2009

quan er ostiu mos didie adiu

desirarie auer era sensibilitat sufisenta
entà encuedar-me d'aquerò que me diden
aguesti que non gosen pas parlar
fòrça còps sonque ne sò conscienta
quan tot demore luenh
massa tard entà respóner

domingo, 1 de noviembre de 2009

escampilhada de color

se li regales ua caisha de colors
a un mainatge petit
te harà eth madeish diboish
que eth que mos regale eth bòsc
enes tardors d'Aran

domingo, 25 de octubre de 2009

amic dante

se de quauquarren sò segura
ei que toti acabaram en in.hèrn
pr'amor que practicam es pecadi capitaus
diderie qu'autaplan damb orgulh
mès en aguest cornèr de mon
ja sabem com ei eth cèu

domingo, 18 de octubre de 2009

era amorassa deth prumèr heired

tròbi qu'era tardor m'apròpe ar ager
e damb er abric deth sòn heired
me lanci a recórrer
es camins des nòsti pair-sénhers

sábado, 10 de octubre de 2009

personatges de valor

non cau pas que mos mòstren guaire entà intuïr
que çò que non auem vist encara
çò que quede entà descorbir
segur que tanben mos agrade

jueves, 1 de octubre de 2009

tànher

pensam que mos hèm a nosati madeishi
que optam per èster o non d'ua manèra
mès era nòsta cultura l'auem diluïda ena sang
e toti es nòsti actes ne son condicionadi
apartiem a ua etnia
non ac podem pas escuélher